Tamacahut n Uqebbab

Macahu, tellemcahu. Ad teghzif amm ugatu.

Herd’en-d yitsen inegmaren izem. Irwel, ikcem s yiwet tiz’gi. T’faren anaghiz-nnes ar t-ttnadan, ur t-ufin.

Izem, netta yekka inger isekwla allig nn-ibedda ghif yiwen uqebbab irez’z’an kra n iqwba, ar isskar tigejda.

Inna-yas yizem : "Tanemmirt-nnek, mek illa ma g i-tteffred ad ur i-nghin yitsen inegmaren, ha-ten-inn kkan-d d’ari !" Irz’em uqebbab yiwen uclif, isekcem-t degs, irar-as tassast yaghul s twuri-nnes.

Imik, han inegmaren uwd’en-d s ghures, yenna-yas yiwen degsen : "Mayed ides tgid ay aterras ?"

Irura-asen, inna-yasen : "Ur illi ughilif ! Tanemmirt-nnun !"

Nnan-as digh : "Akud nna tellid da, is ur ak-d-yagh yiwen waywal da, ikkad az’ey-a ?"

Inna-yasen uqebbab : "Uhu ! Dghi ayd sellagh i kra n ummer’xwec d’art ixlijen nnagh, maca ayenna yawen-nnigh skareksegh mek iga izem negh awtul."

Ddan inegmaren iberdan-nnsen, ar seksiwen s tseggwin is ur ttafan anaghiz n yizem. Ur t-ufin.

Ayenna aggugen, isrey-as uqebbab imi i weclif. Iffegh-d waywal, inna-yas i wergaz : "Tessned is i-yengha laz’, maca mani g ttafagh kra ttettegh amm keyyin ?"

Inna-yas uqebbab : "Ah a ya wa ! Tettud akw amesku digek gigh ? Ghas dghi ayd k- jjenjemgh. Mer idd i nekkin is-nn-tellid ger ifassen-nnsen !"

Inna-yas yizem : "Walu, nigh-ak, ghas ini ayenna trid, aghz’az’ ad ig ili-nnek."

Inna-yas urgaz : "Waxxa, maca ad ak-cerd’egh !"

Iqbel yizem tikti-nnes, inna-yas : "Mayed ghurek ?"

Inna-yas urgaz : "Ad nsesten krad’ inigan, ayenna s ggran akw ad ittug neg-t." Ddan g ubrid, afen-nn agmar ar ikessa g yiwet tmerdult, sestenen-t, inna-yasen :

"Ghez’z’-t ay izem, ghez’z’ anekkar’ n umesku’. Mecta ayd as-gigh allig wessiregh, iger-iss-i g umerdul-a."

Zrin agmar, afen aydi igna ddaw yiwet tasaft, sfafan-t-id g tguni-nnes. Nnan-as mayed as-yaghen, inna-yasen : "Unnagh, ghas mek illa mayed as-ttegged ad ur-ti ttiz’iregh, ad ur as-ttwed’d’ar walu. Ay ayd ides munegh s tegmert ! Ay ayd as-ksigh ! Ay ayd as matregh axam. !Ar ttettegh ghas igaluzen. Iddegh i-yannay kkawegh, ur yad da d-isiggir z’ari. Ghez’z’-t ayd igen awal !"

T’faren abrid ar yiwen uferrugh. Immecteg kra inger wafriwen illan ddaw isekwla. Zgan ad z‘ren mayed illan, zzigh hat innsi. Sbedden-t ad t sestenen. Inna-yasen : "Is tessnem aferru n tmukrist-nnun, ur nn-illi ar adghar g temgam tigi tamezwarut. Dinnagh ag ghuri mayed ttinigh. Mek tram a-naghul, hat ayennagh ayd inmen."

Aghulen s ad’ghar g irez’z’a uqebbab iqwba. Ayenna nn-lekmen, inna-yasen yinnsi : "Iwa, dghi, alsat-i-d i mayed tgam seg tizwuri !"

Inna-yas yinnsi i yizem : "Mayed tgid iddegh k-id-herd’en inegmaren ?"

Irura-yas nwis ikcem aclif. Irz’em-as-t uqebbab, iqqen ghifes. Ind’u-d yinnsi, inna-yas i wergaz : "Mas tteqqeld a war ighef ? Mani tacaqurt-nnek ?"

Izuh’-tt-d, yagh-nn ar iss ikkat izem allig-t iga d iberyan. Ayenna ismed, inna-yas i yinnsi :

"Dghi g tefra ta, righ-k d imensi-nu nekkin d warraw-inu !" Inna-yas yinnsi : " Tzegled g wawal-nnek ! Tettud idd nekkin a k-isxusmen ?"

Zund ur as isella , yasi-t-id ad ur irwel. Inna-yas yinnsi : "Ufla n tawda ! Maca tessned mar ad ur i tegraz’, ghuri icicawen-inu d tewtemt, dduyagh-nn ad ten-inn-nasey i ayt walmessi-nnek is ur ttyawanem !"

Isares-t s akal, ar tteddun. Issawi-t yinnsi ar axbu n tfighra tad’erghalt. Ikcem z’ars, ar as-itteggwer s isennanen-nnes allig tergha, irz’em-as-d, inna-yas i uqebbab : "T’t’ef, han amezwaru yedda-nn !" Igra-d uqebbab afus tewt-t g ud’ad, immet g ud’ghar.

Yenna-yas yinnsi : "Unna yettettun amesku imki ayd as-igan !" Ismed abrid sghur warraw-nnes.

"Zrigh-tt-enn-g tagat, aghulegh-d g talwit. Ar kwen-kkategh s ighsan, ar i-tekkatem s teglay."